《正義迴廊》慶功宴

撰文： 編輯部 | 發布日期： 2022年11月14日

《正義迴廊》上映第3週，為了慶祝電影能夠突破1700萬的票房成績，電影公司今晚 (11月14日) 於尖沙咀舉辦慶功宴，感謝各大傳媒朋友、投資者、各大戲院發行、一眾演員和台前幕後對電影的支持。希望在不久的將來，隨著 《正義迴廊》於海外多個國家及地區時上映，能讓電影票房繼續勢如破竹！

《正義迴廊》導演何爵天率先對所有來賓致謝：「好多謝咁多人去支持《正義迴廊》，阿翁 (翁子光) 話要到2000萬先回到本，咁希望真係回到本啦。到咗2000萬之後我地就會出deleted scene (電影刪減片段)，因為大家成日都問有冇導演版，到時公開嘅 deleted scene 就可以睇到戲院睇唔到嘅版本，有人仲會展示球技表演添！香港人拍嘅香港電影真係要多多支持。」

而兩位男主角，楊偉倫和麥沛東亦感激觀眾支持。在戲中飾演辯護律師的林海峰則說：「喺金鐘睇依套戲嘅時候發現個個都做得好好，真係『好後悔』接咗依套戲。」他續說：「知道套戲嚟緊喺英國會上映，希望之後個票房到達某個數字時可以去英國謝票啦。」引一眾幕前歡呼拍掌。蘇玉華感動表示：「從來冇諗過會有今日 (票房咁高)，因為兩星期前同導演、監製，仲有Michael (周文健) 一齊謝票，個陣個戲院係比較零星落索，但前日去咗7間戲院謝票，每間院都坐滿人㗎！真係好開心，有賴大家 (觀眾) 一直分享套戲出去。到咗依加唔會再問人睇咗未，而係睇咗幾多次。」蝦頭笑言現在潮流穿三點式謝票：「破咗2000萬之後導演就著三點式謝票啦！」

今晚有份出席《正義迴廊》1700萬慶功宴的台前幕後包括導演何爵天、監製翁子光、演員楊偉倫、麥沛東 、蘇玉華 、林海峰 、葉蘊儀、蔡紫晴、朱栢謙、楊詩敏、區焯文、黃宇詩、鍾雪瑩、邱萬城、林善、黃華和、柯驛誼、梁雍婷、王雍泰、何啟南等，感謝台前幕後的付出，和向觀眾傳達感激之情。

資料提供: 高先電影有限公司