《緣路山旮旯》大阪亞洲電影節國際首映

撰文： 編輯部 | 發布日期： 2022年03月29日

《緣路山旮旯》日前於大阪亞洲電影節進行全球首映，首日（3 月 14 日）場次全院爆滿! 礙於新冠疫情關係，電影的台前幕後未能親身出席。幸而有香港移民YouTuber「大阪Andy哥」在當地捧場，完場後更訪問日本觀眾觀後感。受訪觀眾都對黃浩然導演和香港電影情有獨鍾，部份人更於數年前的大阪亞洲電影節觀賞過黃導的前作《點對點》(2015)。日本觀眾對《緣路山旮旯》男主角岑珈其印象深刻，並指電影拍攝角度新鮮有趣，突破他們對香港作為繁榮大都市的固有印象：「能從電影中得知到林林總總的香港自然風景，我本來只知道大都市的香港，這點對我來講很新鮮，製作組拍攝了各種的自然環境，我想感謝他們」、「黃浩然導演的電影每次都能拍攝出很漂亮的香港，這次也帶給我們很好的電影作品，我非常感謝他」。

導演黃浩然亦拍片回應日本觀眾的支持：「現場好多觀眾原來喺2015年嘅時候，已經喺大阪亞洲電影節睇過我第一套電影《點對點》，即係七年之後佢哋再嚟睇我第三套電影，我實在非常開心，非常多謝呢啲觀眾。」對於觀眾對演員的印象，他表示：「其實過去嘅一段時間，香港有好多新一代年青演員，好似岑珈其同戲入面五位女主角，佢哋已經喺香港影壇出現，但需要多啲演出機會，先能夠令觀眾認識佢哋，包括國外觀眾，所以《緣路山旮旯》搵咗好多年輕演員。今次喺大阪亞洲電影節放映，可以令到日本觀眾認識佢哋，呢個係一個好難得嘅機會。我代表岑珈其同五位女主角，多謝日本觀眾對佢哋嘅厚愛。」黃導對觀眾的熱烈反應感到驚喜：「作為呢套戲嘅創作者，我曾經認為外國嘅觀眾以至影展唔會明白呢套戲，亦唔會有興趣，畢竟題材非常本地同埋非常香港。但而家《緣路山旮旯》除咗入選大阪亞洲電影節之外，亦會喺四月入選新加坡華語電影節，我先發覺原來呢部電影對外國觀眾嚟講有一定吸引力，實在好多謝大家支持。」他於片末道：「展望未來，我希望能夠喺今年拍攝我第四部長片，主題關於城市人對智能電話嘅過分依賴同信賴，希望下年或者後年嘅大阪亞洲電影節俾大家睇到。最後亦希望疫情能夠快啲結束，我可以過嚟日本大阪同大家見面，大家亦能夠再有機會來香港，去睇《緣路山旮旯》入面偏遠嘅景點。希望到時見到大家，多謝！」

資料提供: 高先電影有限公司