《武林怪獸》香港配音班底公開

撰文： 編輯部 | 發布日期： 2018年11月27日

《武林怪獸》將於1月3日香港上映。劉偉強導演、爾冬陞監製，二人合力製作一部充滿港式情懷幽默的電影，誓要將原來腥風血雨的江湖變成歡天喜地的派對現場。電影除了古天樂、方中信外，其餘大部份演員是內地演員，有見及此，導演劉偉強誓要為香港觀眾專誠製作一個廣東話版本，好讓入場的每一位更容易投入故事。他並不是隨意找專業配音員完成廣東版，而是找來一些老戲骨以及年青新血齊來為電影配上精彩地道港式對白，令人看得更有親切感。

戲中有前903DJ西瓜、林曉峰（阿LO）、黎耀祥、盧海鵬（鵬哥）、萬綺雯等人為電影配音，眾人也表示當初一聽到劉偉強落柯打要他們來配音，個個也二話不說亦不問詳情就約好時間在錄音室見了。首次參與電影配音工作的西瓜更相當雀躍，因為她本身其實是周冬雨粉絲，當她知道自己是為周冬雨配音時簡直興奮難平：「今次為周冬雨飾演的熊嬌嬌角色配音，得悉是為她的角色配音時已很驚喜，能夠為電影配音本已是一件很開心事，再加上為偶像配音，我會好好珍惜這個機會。經歷很難忘，要演出角色那種可愛得來又堅忍，堅忍得來又帶點入世未深的感覺，是一個大挑戰，希望自己把聲可以襯返個角色。」

至於由《古惑仔》出身的阿LO，與劉偉強導演當然是兩肋插刀，他在戲中為包貝爾飾演的武柏配音：「導演一找我配音，我二話不說就答允。佢俾咗好大機會我，因為包貝爾在戲中某些階段有些語言障礙，要跟住佢個角色去調節聲調、改變語氣，係好大挑戰。而且睇完呢部戲覺得好有趣！劉偉強係得嘅！」

黎耀祥今次為潘斌龍飾演的魯莽配音，人如其名，魯莽行事，他亦配得十分享受：「拍《風雲》時已認識劉偉強，都有二十年前的事。我返回電視台後我們也很少見面，所以今次他找我配音我好開心，配音之餘最主要係可以聚吓舊。因為導演向來好玩又好人，見返佢特別開心，同佢合作永遠都有嘢學，配音過程佢會同我分析每個角色有咩特性，佢想做到咩效果，同時又會俾空間你自由發揮，增添趣味性。過程好順利，又好清楚佢想要啲乜嘢，配出來個效果應該會好好。導演好識享受工作，唔會俾壓力人，好愉快地完成工作，又可以同佢食飯，聚舊時大家又鍾意飲酒，今次真係合作得相當愉快。」把酒當歌，夠曬潚灑。

至於食鹽多過任何人食米嘅鵬哥，戲中也是為王太利這位前輩飾演的岳山翁配音，講起今次配音，當然覺得冇難度：「劉導演一叫我就應承架啦！配音都係咁啦，完全冇難度，佢要我配乜都得架！就算要我講英文呀國語呀我都配到架！最緊要對返個咀型，數返有幾多粒音對返準就得架喇！」

而向來屬於低調派的萬綺雯，甚少出山，今次配音當然也是劉偉強找她就立即應承。導演也刻意找她來配郭碧婷飾演的冷冰冰一角，似足佢，夠晒冷冰冰，當然配得入型入格呢！

資料提供: 寰亞電影